Den Jean-Pierre KREMER ass zu Käerch an engem Haus um Déckebierg (rue de la Montagne) de 4. Januar 1880 gebuer. Seng Eltere waren den Dominique KREMER an d’Marie DELCOUR.

Laut mëndlecher Iwwerliwwerung wär hien fir d’éischt an engem Klouschter Brudder oder Pater gewiescht, wouduerch hien ëmmer « de Pater » genannt gouf. Do hätt hien och d’Fotographie geléiert. Anerer hu gesot, se hätten ‘en esou genannt, well hien e Baart gedroen hätt. Béid Versiounen sinn awer nach ze iwwerpréiwen.

Bestuet huet hien sech 1914 zu Béiwen/Atert mat enger Hiewan, dem Suzanne WAGNER (1895-1971) vu Brouch bei Miersch. Si ass zu Käerch « Patesch Siss » genannt gin.

Si hate just ee Jong, de Jean-Pierre KREMER alias « Patesch Jim » (1916-1971).

De Jean-Pierre KREMER-WAGNER huet an der Ëmgéigend vu Käerch an och doriwwer eraus vill Fotoe gemaach, haaptsächlech Gruppebiller wéi Hochzäiten oder Klassefotoen tëschent ca 1921 an 1956.


Kremer-Wagner, photographe, Koerich - 1929 (Carte postale: KREMER-WAGNER, Koerich; collection A.-M.EVERARD) - Op dëser Postkaart déi hien selwer editéiert huet, schreiwt hien enger Schouljoffer aus der Millebaach, dass hien wéi ofgemaach, den 8.11.1929 bei si Fotoe maache kéim.

Den 1. Mäerz 1958 stierwt de Fotograf zu Käerch a gët och do begruewen. (© Photo: Fernand Toussaint N° 5040)

12.2022 - Anne-Marie EVERARD

Vu lénks no riets : De Fotograph Jean-Pierre KREMER a séng Fra Suzanne WAGNER, d’Irma SCHAAF mat der wäisser Kaz an de Jean-Pierre WAGNER (fils) hannert hirem Haus  8 rue de l’Ecole zu Käerch. D’Haus besteht iwwregens nach. (Archiv (N° 15644) - Collectioun Irma MOES-SCHAAF)